總之係咁(四)

                                                    女皇頭的大細超

( 續三 )

 

按語：以下一段故事，無非想帶出一個訊息。如何擺脫“劣勝優汰”的纏繞，我歸納為“香港經驗”。60~70年代香港工業起飛，靠的是產品質素過硬。MADE IN HONG KONG就是值得那麼多錢！當年的大陸貨(已經是挑選最好的才出口) ，在香港還是擺地灘。香港的公務員和打工仔年年加人工成了“奉旨”。只有這樣，香港的工業才能維持，香港人才用得起香港貨；香港貨的質素不但能保持，而且是越來越好。現在很多人都忘記了這段美好的回憶！

 

        近日特首介紹新局長，叮囑佢地至緊要深入基層，聽聽草根有乜期望。以後工作就會好順嘞。

        我行埋特首耳邊：“……咁咁咁，……咁咁咁，……你明架啦！英國佬都係出呢一招架，乜肥彭冇交低咩？咁絕！一於照板煮碗啦。”

        於是乎，特首開咗三場 Show。

        第一場冇帶呔，著件  T Shirt 好親民， 開一個平民 Show 。

“各位街坊，今日同大家玩個遊戲。大家攞張10蚊紙出嚟，請在10字後面加多個0，政府照認係100蚊。以後大家出糧照現時10倍！”台下雀躍高呼“好嘢！”

        第二場執到正，請哂所有大大小小商界茶聚。

“女士們，先生們。大家都係自己人，今日唔講英文只講中文。今日只係花茶一杯，冇備 Café 。你地啲利潤好勁播，╳╳老闆，我收到風。你件乜乜物物前日重係賣10蚊，點解今日賣100？從明日起賣100蚊嘅嘢只准賣98！”大家又一齊鼓掌，聲言堅決執行。

        第三埸臉帶笑容，請得各路教主。

“各位宗教領袖，希望大家廣播人愛。善哉！善哉！叫善信們知足常樂、銀紙夠使就好，唔好貪得無厭。事事要與人方便，唔好連汁都撈埋！阿門。”阿彌陀佛與乜聲物聲一齊唱和，好鬼和諧。

        有個老記唔生鏽舉手發問，“特首先生，你今日係講新約定觀音經唧？”

        “今日講嘅叫和諧經。啱啱出爐，重熱架！”台下又係一片掌聲。

       老作在旁陰陰咀笑，“我早就預咗呢招啦，張貓紙係唔係使得呢！”

從此天下太平。

雖然一百蚊當10蚊使，數多幾張好快樂。荷包日日都好脹，大家亦好開心。

        一日與老友行街，講起上述故事。撞啱係親民日，遠遠特首就同我打招呼。“老作，你啲屎橋都幾得喎。第日飲開啤啤，比個荷蘭水蓋你。”

        心諗：“咁鬼孤寒。醒枝啤啤就差唔多，個樽蓋點啃呀！” 老作反應都算快，即刻話多謝鼓勵，我會做好呢份工。

        轉咗兩個街口，嗰老友用手踭撞我一下。“衰仔！咁嘅屎橋你都諗到。你做好邊份工先？”

       “之唔係老作囉。日行一善，我都做過童子軍架。”

      “……哈哈哈，有冇肚痛丸呀！比你笑死！哈哈哈……”

        今日大蝕囉，連日日袋住啲鎮山之寶肚痛丸都蝕埋！既然誇咗口話日行一善，只好今日又行多一善啦！