賺咗

賺到

        一日老婆大人話喉嚨痕，想食豬腳薑，於是乎揸住張List 去買嘢。行入超市一眼就望見係“╳珍甜醋份外香”嗰隻，重寫明係買一送一。一於唔諗佢送乜，反正賺咗。照單執藥咁凱旋歸家，以為一定比老婆錫。

        ……客廳傳來大人叫喊，“邊個叫你買枝酸醋架！”。一睇枝細嘅係送嗰枝嚟，真係寫明係酸醋。只好Say sorry 話啱啱冇帶眼鏡，走漏咗眼。呢枝細嘅係送嘅，唔使錢架。大人條氣即時順番，話冇乜鬼用倒咗佢啦。我即時毀屍滅跡倒鬼咗佢，以免眼冤。

        諗落亦覺好笑。賺到變成了賺倒 ( 即係賺埋要去倒 ) 。

        回想舊時在大陸，碰啱經濟困難年代，乜都限量供應。記得冰室門外的告示：

        “……今日下午三時有雪條供應，請大家排隊購買。每人限買四條，售完即止”。一點過後，人龍逐漸形成。盼到冰室開門，大家都好守秩序依次排隊。等咗點幾鐘，咪執輸一於買四條！一個人得兩隻手，於是乎一隻手揸一枝，雪條上面又疊上一枝。場面頗為壯觀。

        無奈炎炎夏日，啜雪條的速度唔夠雪條溶化得快，冰水流到落手踭。連早操動作舉手彎腰都出埋，至緊要係唔好浪費。雪條係乜味冇乜印象，只記得係甜甜地。

        傍邊有人眼掘掘：睇佢個衰樣，食唔切就咪買咁多丫馬。留比後面啲人都唔怕死啦，我排咗成點鐘輪到我時又啱啱賣晒！

        以後對友人談起這事，影番張相留到依家都幾風趣喎。我即時話唔係咁大整估係馬！唔好話當時冇數碼影相機，就算比你影到張黑白相你都幾頭痕！專影大陸啲衰野，你係唔係唔想返香港先！

 

※        現在的香港人變得貪小便宜了，是不是人窮志短呢，我就不敢肯定？有這樣的一個現象說明就有市場。送小禮品的多的是：到銀行開戶的送╳╳優惠，又有╳╳限量紀念品。開戶上網送電器更是五花八門，連數碼相機都有。是否都是實用，真是見仁見智！買樓貸款的送什麼？多到你唔信。你的代價是什麼？做落你就知。